2014ko abenduaren 3a egun garrantzitsua izan da euskaltzaleontzat.

Gure hizkuntzaren normalizazioan Herri gisa aspaldiko partez eman den pausorik garrantzitsuena gertatu da: .eus domeinua publikoki eskuratzeko aukera izatearena.

Normalizazioan ez bakarrik, euskararen ikusgarritasunean ere itzelezko jauzia eman dugu euskaldunok .eus domeinuarekin.

Beasaingo EAJ-PNVn ere gure Herriak emandako pausoa babestu nahi dugu eta eajpnvbeasain.eus domeinua gure jardun digitalean erabiltzeko jauzia ematea erabaki dugu. Hemendik aurrera hemen izango duzue gure jardunaren berri.

WordPress.com plataforman alojaturik geneukan blogean azkeneko bi urteetan sorturiko artikulu eta edukiak gure blog berrian jada txertatu ditugularik, WordPress.com plataforman ideiak eta pentsakerak partekatzeari utziko diogu: eajpnvbeasain.eus izango da gure etxe berria.

Teknikoki hitzeginda, hiru aldaketa nabarmenduko genituzke:

Beasaingo EAJ-PNVren jauzi teknologikoa

Alde batetik, blog berri honek pluginak instalatzeko aukera ematen digu eta instalatu ditugunen artean WPML deritzana azpimarratu nahiko genuke. Plugin honekin blogeko kudeatzaileok edukien hizkuntza erosoki kudeatu dezakegu eta erabiltzaileek edukien hizkuntza -EU edo ES- artean aukeratu dezakezue. Kasu egin eskubiko zutabean agertzen den "Euskara-Español" aukerari.

Blogeko edukiak bi hizkuntzetan prestatuko ditugunean, erosoen zaizun hizkuntza horren bitartez aukeratu dezakezu. Hala ere kontu egin blog zaharretik inportatu ditugun posten hizkuntza bere horretan utzi ditugula.

SEOa zaharra galdu dugu

Domeinu ezberdinak izanik, eajpnvbeasain.wordpress.com domeinuan geneukan SEOa han geratu da eta blog berriarekin 0tik hasi beharra daukagu. Horren ondorio bezala, gure domeinu berria oraindik ez da Googleeko emaitzean azaltzen. Hau hilabeteak aurrera egin ahala bere kabuz zuzenduko da.

Posta elektroniko berriak

Zehazteke ditugu oraindik erabiliko ditugun behin-betiko email helbideak. Oraingoz, indarrean dauzkagun Gmailekoak erabiltzen jarraituko dugu bainan laister eajpnvbeasain.eus pean izango ditugu berriak. Garaiz jakinaraziko dugu gaia.

Amaitzeko laguntza gonbitea luzatu nahiko genizueke WordPress.com-etik zuen domeinu propiora jauzia egin nahi duzuen guztioi.

Norbaitek guk egin dugun aldaketa teknikoa nola egin ezin asmaturik badabil, kaso egin diezagula iruzkinetan eta prozesua denontzat azalduko dugu.

Oraingoz besterik ez, ongietorriak izan zaitezte denak.